تأمّل :
أخت
العريس :
بتعرفو النسوان لما بيحضروا عرس بيفصّلو الموجودين تفصيل
وبيكون عندون ذاكرة فظيعة بيحفظوا كل وحدي بالموجودين شو كانت
لابسة من الكندرة حتى بكلة الشعر...
طبعاً الوصف المكرر كتير اللي بنسمعو كلنا أنو :
العروس كانت حلوة بس بالطبيعة أحلى .
موديل الشعر تبع أخت العريس بيريع (مع العلم أنو أخت العريس بتعرف
أنو شعرا ما بيظبت عند القصاصين وهيي بتعملو أحلى بكتير لحالا بس
كأنو في قانون كنسي ما بيعرفو غير النسوان بينص أنو الوحدة إذا ما
عملت شعرا عند القصاص أو القصاصة مو مسموح تحضر العرس)
أو بيقولو مثلاً : يا لطيف أم العريس كل الحفلة ما ضحكت ولا تحركت
من محلّا أي لأنو هيي ما كان بدها العروس لأبنا (كأنو ابنا الله
خلقو وكسر القالب وما عمتلاقيلو ولا وحدة تليق بمقامو ) أو لأنو
كان بدا أهل العروس يعطوا ابنا شقة أو سيارة أو كام مليون بس خاب
ظنّا أو كان المبلغ اللي نقطوها فيه أهلا للعروس مو متل ما كانت
مفكرة (باعت ابنا بالرخص يا حرام).
بس أحلا وصف سمعتو من وحدة عمتوصف أخت العريس الصبية كيف كانت
بالعرس :
قالت : كان طقم أخت العريس مرتب وتقيل وموديل شعرا حلو كتير بس
كأنو لوحدة كبيرة بالعمر ورايحة على عرس ابن جيرانا!!! |
|
